Hannes Demming laß Bond van Fleming. Dann segg he: "Dat schrief ick up Platt!".
Ottilie Baranowski spiëlt nich Tschaikowsky. Se riemelt up Platt. Daovan verstaiht se wat.
Bombiärg, de Dulle, faoll faak uut de Rulle, mook nix anners äs Spirenzkes un iärgerde de Kaffekränzkes.
Schröders Giärd satt sick up't Piärd, dann gonk't in'n Draff nao Putin hen aff.
Alice Schwarzer wull partout in'n Karzer. Iähr gonk nich in'n Sinn: Mähr Mannslüü äs Fraulüü drin!
Müntefering, dünn äs so'n Hering, mäk sick wat dick in de graute Politik.
Helmut Kohl köff sick en Stohl, up den de Mann alls uutsitten kann.
Augustin Wibbelt gnöchelt un gibbelt: Waorüm sind de Gaise to't Pöggsken so baise?
Britney Spears is wahne twiärs: ´ne annere Frau stiählt iähr de Show!
Ulrichs Jan guet Rad föhren kann. Off Halle off "open" - Hauptsaake: dopen!
Helmut Schmidt in't Fernseihn sitt, smaikt äs dull dat Studio vull.
Sabine Christiansen mott bi'n RTL nich danzen. Iähre Been' kennt auk so jedereen.
To Charles sagg de Queen: "Min Boy, laot dat sin! Camilla, glaif mi, De is nix för di!"
Gastwärt Jopp bedeint in'n Galopp. Freit sick äs dull, staiht de Theke vull.
Wellerdieks Tutta was nienich in Kalkutta. In'n Waolle, wiet drut, dao kennt se sick ut.
Kalthöners Bernd hät dat Scheiten fröh läernt. Nu brengt he, wat he kann, an de jungen Lüe ran.
|