De Liäwer, de is van en Hecht un is nich van 'ne Ule,
wann du maol nix to säggen häs, dann haoll doch diene Mule.

De Liäwer, de is van en Hecht un is nich van en Frettken,
de Tönne mag de Schraoen nich, drüm nimp he sick dat Settken.

De Liäwer, de is van en Hecht un is nich van en Ossen,
wann du kin Geld för'n Rennpiärd häs, kaup di en aollen Zossen.

De Liäwer, de is van en Hecht un is nich van en Stuork,
wann diene Blagen smächtrig sind, stell di an'n Pott un kuok.

De Liäwer, de is van en Hecht un is nich van en Flauh,
häs du kin Pöttken för de Miälk, dann drink glieks ut de Kauh.

De Liäwer, de is van en Hecht un is nich van 'ne Muus,
wat wuß du denn in Rimini? Blief doch met't Gatt an Huus!

De Liäwer, de is van en Hecht un is nich van en Eeken,
to't Fröhstück iätt ick Eier gärn, de hatten un de weeken.

De Liäwer, de is van en Hecht un is nich van 'ne Katte,
wäß di kin Haor mähr up'n Kopp, kriggs du 'ne kaolle Platte.

De Liäwer, de is van en Hecht un is nich van en Buck,

wätt Bauhnenkoffee di to düer, dann drink doch Muckefuck.

De Liäwer, de is van en Swien un is nich van en Aapen,
du moß wull derbe mööde sien, süß dais du nich so gaapen.

De Liäwer, de is van 'ne Luus un is nich van 'ne Duwe,
Karfriedag kümp kin Fleesk in't Huus, dann iätt ick bloß 'ne Struwe.

De Liäwer, de is van en Foß un is nich van 'ne Schrute,
wann du nich dat mäks, wat du moß, dann giff't wat an de Schnute.

De Liäwer, de is van en Hai un is nich van 'ne Otter,
de eene, de läß gärn Karl May, de ann're Henry Potter.

De Liäwer, de is van en Ploog un is nich van 'ne Saise,
de Lüüde kaupt vüör'n Martinsdag Latüchten un auk Gaise.

De Liäwer, de is van en Mest un is nich van 'ne Baor,
ick sin vüörgistern dicke west un nu no nich heel klaor.

De Liäwer, de is van 'ne Luus un is nich van 'ne Schüer,
seß Blagen sind bi mi in't Huus, dat wärd mi ratz to düer.

De Liäwer, de is van en Buck un is nich van en Kleed,
ick drink so gärne klaoren Kluck, den wäer ick nienich leed.

De Liäwer, de is van en Piärd un is nich van en Lappen,
trecks du den Rüen an an den Stiärt, sall he wull nao di snappen.

De Liäwer, de is van'n Kapaun un is nich van en Deif,
de eene, de hät Fraulüü gärn, de ann're Mannslüü leif.

De Liäwer is van Angela un nich van Müntefering,
ick haoll nich viël van Politik, bloß wat van'n Bismarckhering.

De Liäwer, de is van en Hecht un nich van Britney Spears,
et giff up use schöne Welt auk wunnerlicke Diers.

De Liäwer, de is van 'ne Iëgg' un is nich van en Plaug,
stells aobends RTL di an, well sühst du? Günter Jauch!

De Liäwer, de is van en Steen un nich van Christiansen,
de Frau, de hät kurante Been', de dai doch biätter danzen!

De Liäwer, de is van en Hecht un nich van Harald Schmidt,
wat de di üm de Aohren slött, dao kann's up an, dat sitt.

De Liäwer, de is van en Hecht un is nich van en Fiäken,
ick laot bloß Seepe an mi ran, so alle fief, seß Wiäken.

De Liäwer, de is van en Hecht un is nich van 'ne Mutte,
wuß du es eenmaol Paoter wäern, stoppt se di inne Kutte.

De Liäwer, de is van en Hecht un is nich van 'ne Schwalwe,
wärdt di de Literkes to viël, dann drink doch bloß no halwe.

De Liäwer, de is van en Hecht un is nich van 'ne Flauh,
wann't in't Hotel kin Bedde giff, dann legg di doch in't Strauh.

De Liäwer, de is van en Hecht un is nich van en Schaop,
wann du nich dine Augen schlütts, dann kümps du nicg in'n Schlaop.

De Liäwer, de is van en Reih un is nich van en Bullen,
dat Lüütken stonn met weeke Knei vüör't Hüüsken met twee Nullen.

De Liäwer is van'n Kabeljau un is nich van 'ne Scholle,
de eene, de sägg 'Mine Frau' de ann're 'Mine Aolle'.

De Liäwer, de is van en Piärd un is nich van en Fiäken,
nao Moskau flaug gärn Schröders Giärd, waorüm, kann man nu miärken.

De Liäwer, de is van en Bär un is nich van 'ne Henn,
ick weet nu kine Riemel mär, drüm kuem ick faorts to Enn'.

De Liäwer, de is van en Hecht un is nich van en Kawel,

kuem eene Kraihe nich to dicht, de hät en spitz'gen Schnawel.